пятница, 24 февраля 2012 г.

Վերջապես!! Մոտիվացիայի հիմնական գաղտնիքը



Բոլոր մոտիվատոր-առաջնորդները ջերմեռանդ կոչեր են հղում Ձեզ` անընդմեջ աճել ու զարգանալ, գտնել մոտիվացիայի մշտական աղբյուրներ, հետևել ձեր երազանքներին ու առաջ շարժվել` անկախ ամեն ինչից: Այս ամենը իհարկե շատ գեղեցիկ է հնչում, սակայն երբ փորձում եք կյանքի կոչել, պարզվում է, որ ամեն ինչ շատ ավելի դժվար է, քան նրանք նկարագրում են: Ես ձեզ հասկանում եմ ընկերներս. հասկանում եմ, թե որքան դժվար է առավոտյան  բոլորից շուտ արթնանալ, աշխատել շատ, կենտրոնանալ և ավարտել կիսատ գործերը, նոր նախագծեր ու ծրագրեր կազմել, թողնել սոցցանցերն ու ժամանցը և գործով զբաղվել, ես հասկանում եմ, թե որքան դժվար է բաց թողնել այն ամենը, ինչը Ձեզ հարմարավետության և պաշտպանվածության զգացում է պարգևում: Գիտեմ, թե որքան հրապուրիչ և վախեցնող են ձեր երազած ապագայի հեռանկարները, ես գիտեմ ձեր անգործության, ալարկոտության և անտարբերության բոլոր պատճառներն ու հիմքերը, բայց չեմ արդարացնում ձեզ` սեփական անձը չհարգելու և չարաշահելու համար!
Հարց` ինչպե՞ս և որտեղի՞ց գտնել ուժեր և համբերություն անընդհատ զարգանալու, աճելու և առաջ շարժվելու համար
Ես կպատասխանեմ Ձեզ
Շրջապատ!! 

Այո´, ընկերներ, հենց ձեր շրջապատն է բնորոշում ձեզ և ձեր կյանքի որակը: Միշտ հիշե´ք, որ ձեր շրջապատի մարդիկ են ձևավորում ձեր անձը, ձեր առօրյան, սովորությունները և աշխարհայացքը: Եթե ձեր շրջապատում միայն պարտվողներ են և չկա գեթ մեկ հաղթող, դուք նույնպես պարտվող եք: Ես ամենևին չեմ առաջարկում հրաժարվել ձեր ընկերներից ու հարազատներից, այլ փորձում եմ ցույց տալ, որ պետք է ծանոթանալ այն մարդկանց հետ, ում փոխարեն դուք կցանկանայիք հայտնվել: Բարձր կոմպետենտության, դրական էներգիայի և առողջ գիտելիքների տիրապետող մարդիկ են միայն ձեզ հարկավոր, եթե որոշել եք դուրս գալ մոխրագույն անհրաժեշտությունից և մտնել գունագեղ իրականություն
Ուշադիր եղե´ք, եթե ներկայումս ձեր կյանքում որևէ դրական շարժ է տեղի ունենում,  որևէ  նոր քայլ առաջ կամ նոր, կարևոր որոշում`  ապա ես վստահ եմ, որ ոչ շատ վաղուց ձեր կյանք որևէ նոր մարդ էր ներխուժել:
Նոր, թարմ և ուժեղ մարդկանց գտե´ք, ծանոթացե´ք, ընկերացե´ք, խորհուրդներ հարցրեք, մի մեծամտացե´ք, մի´ փորձեք ամեն ինչ անել միայնակ, որովհետև վատնում եք ժամանակը և ուժերը, սնափառ և փառասեր մի´ եղեք: Միշտ հիշե´ք, եթե դուք հաղթողի կեցվածք եք ընդունել, պարտավոր եք առաջին հերթին փոխել շրջապատը: Այն հաճույքն ու բավարարվածությունը, որ դուք կստանաք ձեզանից շատ հարցերում կեմպետենտ մարդկանց կողքին գտնվելով, անհամեմատելի են: Մարդիկ, ովքեր կսատարեն ձեզ դժվար պահին, բայց ձեզ հետ չեն զբաղվի դատարկաբանությամբ, ովքեր ձեզ կտան իրենց փորձն ու գիտելիքները, իրենց հոգատար վերաբերմունքը և անտեղի չեն գովերքի ձեր անձը: Զգում եք դուք դա, թե ոչ` ձեր անմիջական շրջապատն է ստեղծում ու հետզհետե հղկում ձեր անձը` բոլոր առումներով:
 Այս մասին ես դեռ կխոսեմ, իսկ առայժմ այսքանը:) 

воскресенье, 12 февраля 2012 г.

Լավ օրվա առողջ սկիզբ..


Ողջույն բարեկամներս:) 
Նախաճաշը այն հրաշալի երևույթն է, որը ապահովում է ամբողջ օրվա մեր պայծառ գույները, լավ տրամադրությունը, կենսական էներգիան ու բարձր աշխատունակությունը: Օրվա ընթացքում ընդունած սնունդի ամենակարևոր չափաբաժինը պետք է տրամադրվի հենց նախաճաշին, քանի որ մեզ անհրաժեշտ ածխաջրերի և վիտամինների մեծ մասը հարկավոր են մեզ հենց սկսած առավոտվանից:


Դուք քնա՞ծ եք մնացել: Հմմ, ահաբեկված դուրս եք թռչում անկողնուց ու մի կերպ պատրաստվելով դուրս գալիս տնից` առանց նախաճաշելու (իսկ վատագույն դեպքում մեկ գավաթ սուրճ խմելով): Սա ձեր օրվա իդեալական սկիզբը չէ, ի՞նչ խոսք: Եկե´ք պատկերացնենք և միասին կյանքի կոչենք ձեր օրվա լավագույն սկիզբի մոդելներից մեկը: 
Ձեզ հարկավոր է գեղեցիկ առավոտ, թարմ և հանգստացած օրգանիզմ ու առողջ նախաճաշ: Առաջին երկուսի մասին կասեմ միայն այն, որ անհրաժեշտ է քնել կեսգիշերից ոչ ուշ և արթնանալով, անմիջապես ժպտալ ու շնորհակալ լինել սպասվող գերազանց օրվա համար:
Իսկ այժմ մի առողջ նախաճաշի տարբերակ` իմ կողմից: 
Երբ արդեն դուրս եք եկել սենյակից և դեպի լոգարան ճանապարհին եք, մտե´ք խոհանոց և խորը ամանի մեջ լցնելով վարսակի (овсянка не требующая варки) կամ որևէ այլ հացահատիկի փաթիլներ, վրան լցրեք եռացրած կաթ, ծածկեք որևէ բանով և շարունակե´ք Ձեր առավոտյան գործերը: Առնվազն հինգ րոպե անց ձեր փաթիլները արդեն պատրաստ են, վրան ավելացրեք չամիչ, մանրացված չրեր կամ ընկուզեղեն ու թարմ մրգեր և վերջում ` մեղր: Այն կլինի քաղցր, ուստի իդեալական է նաև նրանով, որ կբարձրացնի կենսական էներգիան կամ ինչպես ասվում է Այուրվեդայում` պրանան: Այս ամենի հետ հարմար են սուրճը կամ թարմ քամած հյութը: Սա այն նախաճաշն է, որը ուրախացնում է ինձ շաբաթվա երեք օրերին: Այս պարզ նախաճաշը Ձեզ կպարգևի թեթևության և հաճելի առույգության զգացում, կազատի մինչև հաջորդ սնվելը որևէ բան ուտելու վնասակար սովորությունից: Բարի ախորժակ ընկերներս,  հիշե´ք, որ լավ օր ունենալու համար անհրաժեշտ է լավ սկսել այն և շնորհակալ լինել այդ օրվա համար:)

понедельник, 19 декабря 2011 г.

Ստեղծե´ք միայն գեղեցիկն ու բարին...

"Անի´, մի բան լավ հիշիր. կյանքում ամեն ինչ արա միայն կառուցողական սկզբունքով: Երբեք քայքայիչ գործունեություն մի ծավալիր, եթե դիմացինի կառուցած շենքը համարում ես անհարիր ու տգեղ, ոչ թե քանդիր այն, այլ կառուցիր այնպիսի մի շենք, որը իր գեղեցկությամբ ու նշանակությամբ հետին պլան մղի առաջինին..." Սա իմ կյանքի կարևորագույն խորհուրդներից էր, շատ դիպուկ ու աներևակայելի բարի պատգամ, որ ստացա իմ ավագ ընկեր, Դիջիլիբ թվանշային գրադարանի գիտական ղեկավար, ազգագրագետ, հայագետ Մերուժան Կարապետյանից:
Հաճախ, երբ մենք ականատես ենք լինում որևէ անպատասխանատու հայտարարություն, պոռոտախոսության կամ թերի կատարված գործի, անբարոյական վերաբերմունքի որևէ ազնիվ գործի հանդեպ կամ ոչ պրոֆեսսիոնալ մոտեցում, բարկանում ենք ու անմիջապես սկսում քննադատել, հակահարվածներ տալ ու քայքայել մեր ներքին ներդաշնակությունը: Իրականում, մեր նման վերաբերմունքը, ներքին խռովքն ու անգամ գործնական հակակշիռ քայլերը ոչ մի դրական, ընդհանրապես ոչ մի արդյունք չեն տալիս: Միայն բացասական տպավորությունն ու դատարկախոսությունն է մնում արդյունքում: Միշտ պետք է հիշել, որ պայքարելով որևէ երույթի դեմ, դուք դրանով իսկ, ավելի եք հզորացնում այն, դուք ողջ ձեր ստեղծագործ ու առողջ էներգիան վատնում եք մյուսների գործերը քննադատելու ու վարկաբեկելու վրա: Կարևոր չէ, թե որքան վատն են մյուսները, կամ թե որքան դատարկ գործունեություն են նրանք ծավալում, կարևորը այն է, որ դուք եկել եք այս աշխարհ որոշակի առաքելությամբ, դուք ունեք մեծ հոգևոր ուժեր և չբացահայտված տաղանդներ, և այն ժամանակը որ ծախսում եք մյուսներին քննադատելու ու վատաբանելու վրա, ծախսեք ի շահ ձեզ և մյուսների: Կառուցեք այն իդեալականը, ստեղծեք այն գեղեցիկը, ուսումնասիրեք այն ճանապարհով, որը ըստ ձեզ մյուսները սխալ կամ վատ են արել.. Ստեղծե´ք. ոչ թե քանդե´ք.. 
Միշտ լինելու են անպատասխանատու ու տգետ մարդիկ, որոնք աղավաղելու են որևէ ոլորտ, որևէ կարևոր բան, և որի դեմ դուք պետք է հանդես գաք սեփական զենքով, դուք պետք է մարդկանց ցույց տաք այլընտրանք, պետք է առաջարկեք մեկ այլ ճանապարհ, որը ըստ ձեզ ճիշտ է և բարի: Սիրե´ք այն, ինչով զբաղվում եք, և ձգտեք լինելը լավագույնը այդ ոլորտում, իսկ այն ոլորտները որոնք դուք չեք ուսումնասիրել կամ որոնցում չունեք նշանակալից գիտելիքներ, սեփական անձի գանձարանում համապատասխան ներդրումներ չեք արել, և ընդամնեը ցանկանում եք որևէ բան ասել, կամ որևէ մեկին ցույց տալ, որ նա սխալ է, խնդրում եմ մի պահ կանգ առե´ք, մտածե´ք, թե որքան տգեղ է այդ քայլը, կամ որքան քայքայիչ...Եղե´ք ազնիվ, ծայրահեղ ըմբռնող, համեստ և քչախոս, խոսե´ք ձեր գործերով, սեփական անձը գովաբանելով դուք կվանեք մարդկանց ձեզանից... 
Միշտ հիշե´ք, երբ Մայր Թերեզային խնդրեցին միանալ շարժմանը ընդդեմ պատերազմի, նա ասաց. "Ես կողմ եմ խաղաղությանը.." 

Հ.Գ.  Մոռացա նշել, որ եթե ձեր մտքով անցնում է որևէ մեկին որևէ բան սովորեցնել կամ խորհուրդ տալ, մի պահ մտածե´ք, արդյոք դուք այդ հարցի շուրջ ունե՞ք համապատասխան գիտելիքներ ու փորձ, և արդյոք ձեր գործունեությունը դրական ենթատեքստով է թե ոչ...

Մնա´ք բարյավ:)